Финланд улс мягмар гарагт НАТО-гийн 31 дэх гишүүн улс боллоо. Тус улсын Гадаад хэргийн сайд Пекка Хаависто Брюссель дэх НАТО-гийн төв байранд АНУ-ын Төрийн нарийн бичгийн дарга Энтони Блинкенд албан ёсны баримт бичгийг хүргүүлснээр гишүүнээр элсэх үйл явц ийнхүү өндөрлөжээ.
Блинкен Финланд улс НАТО-д элссэнийг "түүхэн өдөр" хэмээгээд, энэ нь Владимир Путины Украинд эхлүүлсэн дайнтай холбоотой гэв. Тэрээр "Энэ бол ноён Путинд талархаж болох цорын ганц зүйл гэж би хэлмээр байна" гэжээ.
НАТО-гийн Ерөнхий нарийн бичгийн дарга Йенс Столтенберг сэтгүүлчдэд "Энэ нь Финландыг аюулгүй, НАТО-г илүү хүчирхэг болгоно" гэж мэдэгджээ. Тэрээр "Ерөнхийлөгч Путины довтолгооны зорилго өөрийн улсын хилийн дагуу НАТО-гийн орнуудыг цөөлөх, Европт шинэ гишүүн элсүүлэхгүй байх зорилготой байсан ч яг эсрэгээрээ боллоо" гэжээ.
Финланд улс Шведийг НАТО-д элсэхийг дэмжинэ гэж тус улсын Ерөнхийлөгч Саули Ниинистё мэдэгдэв. "Шведийн гишүүнчлэлгүй бол Финландын гишүүнчлэл бүрэн бүтэн болж чадахгүй. Шведийг НАТО-д элсүүлэх ажил тасралтгүй үргэлжилж байна" гэж Ниинистё мэдэгджээ.
ОХУ-ын Ерөнхийлөгчийн хэвлэлийн төлөөлөгч Дмитрий Песков Финланд улс НАТО-д элссэн асуудлаар тайлбар хийхдээ Оросын аюулгүй байдал, үндэсний ашиг сонирхолд халдаж байна гэж мэдэгдэв.
"Нөхцөл байдлыг улам хурцатгалаа гэж Кремль үзэж байна. НАТО-г өргөжүүлснээр манай аюулгүй байдал, ОХУ-ын үндэсний ашиг сонирхолд халдаж байна. Бид ингэж л хүлээж авч байна. Өөрсдийн аюулгүй байдлыг хангахын тулд тактикийн болон стратегийн сөрөг арга хэмжээ авахад биднийг хүргэж байна" гэж Песков хэлжээ.
Эх сурвалж: ВВС
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
3,376.43 
°C
Сэтгэгдэл бичигдээгүй байна