Шүүхийн ерөнхий зөвлөлөөс зохион байгуулж буй “Шүүх, шүүгчийн аюулгүй байдлыг хангах” сэдэвт шүүхийн Тамгын газрын дарга нарт зориулсан практик сургалт өнөөдөр (2024.09.27) Дорноговь аймгийн Замын-Үүд сумын шүүхийн Тамгын газарт болж байна.
Сургалтад Шүүхийн ерөнхий зөвлөлийн гүйцэтгэх нарийн бичгийн дарга Б.Эрдэнэтулга, Шүүгчийн хараат бус байдал, хууль ёсны ашиг сонирхлыг хамгаалах албаны дарга Х.Билгүнзаяа, нийт шүүхийн Тамгын газрын дарга нар болон бусад албан хаагчид оролцлоо. Мөн нээлтийн үйл ажиллагаанд хил орчмын шүүхийн төлөөлөл болох Бүгд Найрамдах Хятад Ард Улсын Өвөр Монголын Өөртөө Засах орны Эрээн хотын Ардын шүүхийн төлөөлөл урилгаар оролцов.
Тус сургалтыг Цагдаагийн ерөнхий газар, Онцгой байдлын ерөнхий газартай хамтран зохион байгуулж байгаа бөгөөд сургалтаар шүүх, шүүгчийн аюулгүй байдлыг хангахтай холбоотой батлагдсан хууль тогтоомж, дүрэм, журмыг хэрэгжүүлэх талаар нэгдсэн ойлголтод хүрч мэдлэг, мэдээлэл олгохоос гадна онцгой нөхцөл байдал үүссэн үед шүүхийн Тамгын газрын зүгээс хариу арга хэмжээг шуурхай хэрэгжүүлэх, холбогдох эрх бүхий мэргэжлийн байгууллагатай хэрхэн хамтран ажиллах талаар танхимын болон практик дадлага сургуулилтыг хосолсон хэлбэрээр явуулж байна.
Мөн сургалтын үйл ажиллагааг бүхэлд нь видео контент хэлбэрээр хадгалан авч, цаашид бусад шүүхийн захиргааны ажилтнууд цахимаар үзэх боломжийг бүрдүүлж байгаа нь ач холбогдолтой юм.
Хэвлэл мэдээллийн хэлтэс
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
3,417.49 
°C
Сэтгэгдэл бичигдээгүй байна