Украины ерөнхийлөгч Володимир Зеленський ОХУ-ын талтай энэ лхагва гарагт энхийн хэлэлцээний уулзалт хийхээр болсныг мэдээллээ.
Энэ уулзалт мөн Туркийн Истанбул хотноо болох гэнэ. Энэ талаар Оросын Тасс агентлаг мөн мэдээлсэн бөгөөд RIA агентлагийн мэдээллээр дээрх уулзалт хоёр өдөр үргэлжлэх төлөвтэй байна.
Гэхдээ Кремлийн зүгээс уулзалтын тов тодорхой болоогүй байгаа гэсэн бөгөөд талууд дайныг зогсоох талаар "тэс өөр байр суурьтай" байгааг онцолжээ.
Зеленьский ээлжит шөнийн мэдэгдэлдээ "Үндэсний аюулгүй байдал, батлан хамгаалах зөвлөлийн нарийн бичгийн дарга Рустем Умеровтой хоригдол солилцох асуудлаар ярилцсан.
Мөн тэрбээр Оросын талтай энхийн хэлэлцээний уулзалтыг лхагва гарагт хийхээр төлөвлөж буйг мэдээлсэн. Илүү дэлгэрэнгүйг маргааш хэлье" гэсэн байна.
Талууд өмнө нь хоёр ч удаа энхийн хэлэлцээний уулзалт зохион байгуулсан ч тодорхой шийдэлд хүрч чадаагүй.
Сүүлийн долоо хоногуудад Оросын зэвсэгт хүчин Украины хэд хэдэн хот руу тасралтгүй довтолж байна.
Даваа гаргийн шөнө гэхэд пуужин болон хэдэн зуун дроны дайралтаар Украинд хоёр хүн амиа алдаж, 15 хүн шархаджээ. Үүний хариуд Украины талаас ч мөн дрон буюу нисгэгчгүй онгоцоор довтолж буй.
Зеленський "Манай талаас хэлэлцээнд тавих үндсэн шаардлага бол олзлогдогсдыг буцаах, Орос руу хууль бусаар авч явсан хүүхдүүдийг эх оронд нь авчрах, мөн төрийн тэргүүнүүдийн уулзалтад бэлтгэх" гэв.
Путин Украины ерөнхийлөгчийн таван жилийн бүрэн эрхийн хугацаа дууссан ч шинэ сонгууль явуулаагүй тул Зеленськийг хууль ёсны төрийн тэргүүн гэж үзэхгүй байгаагаа илэрхийлдэг.
Эх сурвалж: Reuters
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
3,592.79 
°C
Сэтгэгдэл бичигдээгүй байна